Təhsil Nazirliyinə müraciət statistikası
Təhsil Nazirliyi vətəndaş müraciətləri ilə bağlı statistika yayıb. Rəsmi məlumatda bildirilir ki, fevral ayında telefon məlumat mərkəzinə (“Qaynar xətt”: 146) və vətəndaşların qəbulu mərkəzinə ümumilikdə 15 min 693 müraciət daxil olub.
Hesabata görə, telefon məlumat mərkəzində 12 min 687 zəng qəbul edilib, vətəndaşların qəbulu mərkəzində isə 3 min 6 vətəndaşa xidmət göstərilib, o cümlədən 1283 sənəd (659 məktub, 401 ərizə, 223 digər sənəd) qəbul olunub və qeydiyyata alınıb.
Daxil olan müraciətlər daha çox tələbələrin yerli ali və orta ixtisas təhsil müəssisələrinə köçürülməsi və bərpası, ali təhsil sənədlərinin (diplomların) tanınması, ümumtəhsil məktəblərinin 1-ci siniflərinə qəbul, müəllimlərin işə qəbulu, müəllimlərin diaqnostik qiymətləndirilməsi ilə bağlı məsələləri əhatə edib.
