Ötən il və son üç ildə nə qədər iş yeri açılıb?
2016-cı ildə ölkədə 196,5 min yeni, o cümlədən 154,9 min daimi iş yerləri açılıb. Yeni iş yerlərinin 69,3 faizi qeyri-dövlət sektorunun payına düşür. Yeni iş yerlərinin 24,9 faizi Bakı şəhərində, 1,5 faizi Naxçıvan Muxtar Respublikasında, 73,6 faizi regionlarda yaradılıb. Daimi iş yerlərinin 9,7 faizini yeni yaradılmış müəssisə və təşkilatlar, 18,2 faizini mövcud müəssisə və təşkilatlar, 0,8 faizini fəaliyyətini bərpa etmiş müəssisə və təşkilatlar, 71,3 faizini isə fərdi sahibkarlıq subyektləri təklif edib.
Hüquqi şəxslərin yaratdığı daimi iş yerlərinin 4,5 faizi dövlət idarəetməsi və müdafiə; sosial təminat, 4 faizi tikinti, 3,9 faizi ticarət; nəqliyyat vasitələrinin təmiri, 2,9 faizi emal sənayesi, 2,5 faizi su təchizatı; tullantıların təmizlənməsi və emalı, 1,6 faizi peşə, elmi və texniki fəaliyyət, 1,3 faizi nəqliyyat və anbar təsərrüfatı, 1,2 faizi kənd təsərrüfatı, meşə təsərrüfatı və balıqçılıq, 1,1 faizi daşınmaz əmlakla əlaqədar əməliyyatlar, 5,7 faizi isə digər iqtisadi fəaliyyət növləri üzrə açılıb.
Dövlət Statistika Komitəsindən AZƏRTAC-a bildiriblər ki, regionların sosial-iqtisadi inkişafına dair üçüncü dövlət proqramının icrasını əhatə edən 2014-cü il yanvarın 1-dən bu il yanvarın 1-dək Azərbaycanda 351,1 mini daimi olmaqla ümumilikdə 439,7 min iş yeri yaradılıb.
