Gürcüstan və Ermənistandan axıdılan tullantılar Kürü çirkləndirməkdə davam edir
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların transsərhəd qollarının çirklənmə vəziyyətini öyrənmək məqsədilə fevral ayının üçüncü ongünlüyündə növbəti monitorinqləri həyata keçirib.
Nazirlikdən Novator.az-a verilən məlumata görə, Kür çayında su sərfinin fevral ayının ikinci ongünlüyünə nisbətən azaldığı müəyyən olunub.
Monitorinqin nəticələrinə əsasən, Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olduğu müşahidə edilib.
Suyun tərkibindəki spesifik çirkləndiricilərdən fenollar Şıxlı-2 məntəqəsində 4.9, Ağstafaçayda 4.2, Ağstafaçay su anbarında isə 3 dəfə yol verilən qatılıq həddini keçib.
Fenollar Araz çayı üzrə Horadizdə 2, Birinci Şahsevəndə 2.2, Bəhramtəpədə isə 2.4 dəfə yol verilən qatılıq həddindən artıq olub.
Mis birləşmələri isə Kür və Araz çayları üzrə bütün məntəqələrdə norma daxilində tərəddüd edib.
Suyun oksigen rejimi bütün məntəqələrdə sanitar norma daxilində dəyişib.
