Erməni nazirdən “tanınma” iddiası
Ermənistanın Xarici İşlər Nazirliyi martın 1-də Azərbaycanın işğal olunmuş Xankəndi şəhərində Mərkəz Aparatın və diplomatik korpusun nümayəndələrinin müşavirəsini keçirib. Novator.az-ın məlumatına görə, Xankəndidə jurnalistlərə açıqlama verən xarici işlər naziri Edvard Nalbandyan Qarabağ münaqişəsindən danışıb. O, Azərbaycanın sülh danışıqlarında uduzduğunu iddia edib və deyib ki, Bakı bunun əvəzini güclə çıxmağa çalışır.
Nalbandyan qeyd edib ki, bu ilin sonunadək dünya ölkələrinin birinin Dağlıq Qarabağı müstəqil dövlət kimi tanıması istisna olunmur.
1988-ci ildə Ermənistan Azərbaycanın Dağlıq Qarabağ vilayətini özünə birləşdirmək üçün hərbi təcavüzə başlayıb. Dağlıq Qarabağ vilayəti 1991-ci ildə özünü müstəqil dövlət elan edib. Ermənistan bu bölgəni və daha 7 rayonu işğal altında saxlayır. ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
Bu il fevralın 20-də keçirilmiş qanunsuz “konstitusiya referendumu”nda bölgənin adı dəyişdirilib, separatçı rejim “Dağlıq Qarabağ Respublikası” adını ikinci plana keçirib, “Arsax Respublikası” əsas ad olub.
