Pakistanda hərbi razılaşma
Pakistan səfərində olan prezident İlham Əliyev fevralın 28-də baş naziri Məhəmməd Nəvaz Şəriflə görüşüb. Təkbətək görüşdə iki ölkə arasında siyasi əlaqələr müzakirə edilib, beynəlxalq təşkilatlar çərçivəsində qarşılıqlı dəstəyin əhəmiyyəti vurğulanıb, Dağlıq Qarabağ münaqişəsi və Kəşmir problemi ilə bağlı qarşılıqlı dəstək və qətiyyətli mövqe nümayiş etdirildiyi qeyd olunub.
Müdafiə və müdafiə sənayesi sahəsində konkret layihələrin müzakirə olunduğu, Azərbaycanın Pakistanın inkişaf etmiş hərbi sənaye kompleksinin məhsullarını idxal etməsi ilə bağlı razılaşma əldə edildiyi bildirilir.
Görüş nümayəndə heyətlərinin iştirakı ilə geniş tərkibdə davam etdirilib, Azərbaycan Respublikası ilə Pakistan İslam Respublikası arasında enerji sahəsində əməkdaşlıq haqqında saziş imzalanıb.
Sonra İlham Əliyev Pakistan prezidenti Məmnun Hüseynlə bir araya gəlib. Görüşdə iki ölkə arasında siyasi əlaqələrin yüksək səviyyədə olduğu qeyd edilib, Dağlıq Qarabağ münaqişəsi və Kəşmir problemi ilə bağlı Azərbaycanın və Pakistanın bir-birinin ədalətli mövqeyini dəstəkləməsində qətiyyət göstərdikləri vurğulanıb, regional təhlükəsizlik və əməkdaşlıq məsələləri müzakirə olunub.
AZƏRTAC-ın məlumatına görə, həmin gün İslamabadda İlham Əliyevin Türkiyə prezidenti Rəcəb Teyyub Ərdoğanla da görüşü olub. Görüşdə ikitərəfli münasibətlərin bir sıra sahələrdə, o cümlədən xarici ticarət sahəsində inkişaf etdiyi bildirilib, enerji sahəsində həyata keçirilən layihələrdən danışılıb, onların uğurla davam etdirilməsinin əhəmiyyəti vurğulanıb.
Həmin gün Məmnun Hüseynin adından İqtisadi Əməkdaşlıq Təşkilatının 13-cü sammitində iştirak edən nümayəndə heyəti rəhbərlərinin şərəfinə şam yeməyi verilib. İlham Əliyev şam yeməyində iştirak edib.
Martın 1-i İslamabadda İqtisadi Əməkdaşlıq Təşkilatının sammiti işə başlayıb.
