Su anbarlarının sayı artırılır
“Azərsu” Səhmdar Cəmiyyəti 2015-ci ildə 35, ötən il 15 su anbarı inşa edərək istismara verib, bu il isə daha 10 su anbarının tikilməsi nəzərdə tutulub. “Azərsu”nun mətbuat xidməti və ictimai əlaqələr şöbəsinin rəhbəri Anar Cəbrayıllı AZƏRTAC-a belə deyib.
2015-ci il oktyabrın 28-də istismara verilən, ultrasüzgəc mexanizmi ilə işləyən Ceyranbatan sutəmizləyici qurğular kompleksi saniyədə 6.6 kubmetr, sutka ərzində 570 min kubmetr su ilə təchiz edilir. Anar Cəbrayıllının sözlərinə görə, kompleksdə təbii mineral tərkibi qorunmaqla təmizlənən suyun keyfiyyəti Dünya Səhiyyə Təşkilatlarının tələb və standartlarına tam cavab verir.
“Azərsu” Səhmdar Cəmiyyəti həm də çirkab sularının toplanıb zərərsizləşdirilməsi prosesinə nəzarət edir. Anar Cəbrayıllı vurğulayıb ki, bu xidmətlər nəticəsində çaylarda, göllərdə, kanallarda nəzarət gücləndirilir və Xəzər dənizinin ekoloji təmizliyinin qorunub saxlanılması üçün sutəmizləyici qurğular tikilib istismara verilir.
Anar Cəbrayıllı deyib ki, ötən il Şamaxı, Göyçay rayonlarında tikintisinə başlanan qurğularda işlər yekunlaşmaq üzrədir və 2017-ci ildə Gəncə şəhərində, eləcə də Şəki, Xızı, Gədəbəy, Beyləqan, Tərtər və Gədəbəy rayonlarında, həmçinin paytaxtın Pirşağı qəsəbəsində tullantı təmizləyici qurğuların inşasına başlanacaq.
