İmtahan Mərkəzi Tarif Şurasının qərarını gözləyir
Fevralın 28-də mətbuat konfransı keçirən Dövlət İmtahan Mərkəzinin Direktorlar Şurasının sədri Məleykə Abbaszadə deyib ki, bu ildən magistratura, rezidentura və dövlət qulluğuna qəbulla bağlı müsabiqədə iştirak ödənişli olacaq: “Bu həftə ərzində Tarif Şurası qərarını elan edəcək”.
Prezidentin 24 fevral sərəncamından söz açan Məleykə Abbaszadə deyib ki, ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər güzəştləri nəzərdə tutur. Onun sözlərinə görə, bu il qəbul imtahanlarında iştirak üçün ilk dəfə müraciət etmiş şəxslərin ilk imtahanda iştirakına görə ödənişi dövlətin boynundadır, ikinci imtahanda iştirakına görə ödənişi isə abituriyent özü ödəyəcək: “Prezidentin sərəncamından bu il təxminən 70 min gənc faydalanacaq. Bu sənəd gənclərin imtahanda iştirakına çox müsbət təsir göstərəcək, onların təhsil almasına böyük təkan verəcək. Təbii ki, bu ilin məzunlarının hamısı qəbul imtahanlarında iştirak üçün ilk dəfə müraciət edənlər sırasında olacaq”.
Xəbəri AZƏRTAC yayıb.
