Ermənistan iqtisadiyyatı həm artıb, həm də geriləyib
Ermənistanın Milli Statistika Xidməti 2016-cı ilin iqtisadi göstəricilərini açıqlayıb. Novator.az-ın məlumatına görə, açıqlamada qeyd olunur ki, ötən il Ermənistanda ümumi daxili məhsul (ÜDM) 0,2% artaraq 10,5 milyard dollara yaxınlaşıb. Bu artımın son 7 ilin ən aşağı göstəricisi olduğu bildirilir.
Adambaşına ÜDM-in 3,5 min dollar olduğu bəyan edilib.
Hesabatda qeyd olunur ki, ötən ilin ilk rübündə iqtisadiyyat 4,7%, ikinci rübündə 2,6% artıb. Üçüncü rübdə 2,6%, dördüncü rübdə 1% azalma qeydə alınıb.
Ermənistanda ötən il tikinti sektorunun 11,3%, kənd təsərrüfatının 5,8% gerilədiyi, sənayedə, ticarət və xidmət sahəsində isə artım olduğu vurğulanır.
Xatırlatma: Azərbaycanın Dövlət Statistika Komitəsi bəyan edib ki, 2016-cı ildə ölkədə 59,9 milyard manatlıq (33,9 milyard dollar) və ya 2015-ci ildəkindən 3,1 faiz az ümumi daxili məhsul istehsal edilib. Ümumi daxili məhsulun əhalinin hər nəfərinə düşən dəyəri 6,2 min manat (3,5 min dollar) olub.
