“Məni dəstəkləyəcək bir şəxsiyyət var”
Birinci vitse-prezident Mehriban Əliyeva “Rossiya 1” telekanalına müsahibə verib. Müsahibə fevralın 26-da “Vesti nedeli” proqramında göstərilib.
Mehriban Əliyeva qeyd edib ki, onu Azərbaycanın birinci vitse-prezidenti vəzifəsinə təyin etmək qərarı Azərbaycan prezidentinin şəxsi təşəbbüsü olub: “Əlbəttə, uzun illər ərzində təkcə prezidentin xanımı deyil, həm də onun silahdaşı olmağım da, yəqin ki, öz rolunu oynayıb”.
“Siz dərhal razılaşdınızmı” sualına cavabında Mehriban Əliyeva deyib: “Biz müzakirələr aparır, götür-qoy edirdik. Mənim əsas tərəddüdüm üzərimə qoyulan bu məsuliyyətin öhdəsindən nə dərəcədə gələ biləcəyim müstəvisində idi. Mən birmənalı şəkildə bilirəm və əminəm ki, dövlətin maraqları ilə həyat yoldaşımın mənə tövsiyələri və deyəcəkləri tamamilə üst-üstə düşəcək. Deməli, yanımda onun simasında birmənalı şəkildə mənə kömək edəcək, hər hansı çətinliyim olarsa, məni dəstəkləyəcək, düzgün yol göstərəcək bir şəxsiyyət var. Mən prezidentin etimadını, ən başlıcası isə inamı, ümidləri olan insanların etimadını doğrultmalıyam”.
Xəbəri AZƏRTAC yayıb.
Mehriban Əliyeva fevralın 21-də birinci vitse-prezident təyin edilib.
Konstitusiyanın 105-ci maddəsinə görə, prezident vaxtından əvvəl vəzifədən getdikdə yeni prezident seçilənədək prezident səlahiyyətlərini birinci vitse-prezident icra edir.
