İsa Qəmbər ifadəsindən danışdı
Müsavat Partiyasının sabiq başqanı İsa Qəmbər və indiki başqan Arif Hacılı fevralın 27-də ifadə vermək üçün Baş Prokurorluğun Ağır Cinayətlərə Dair İşlər üzrə İstintaq İdarəsinə çağırılıblar. Dindirmələrin saxta sənədlərlə mühacir statusu almaq istəyən şəxslərin işi ilə bağlı olduğu bildirilir.
“Azadlıq” radiosunun məlumatına görə, İsa Qəmbər ifadə verib çıxandan sonra jurnalistlərə deyib: “Əgər prokurorluqda dedikləri kimi, saxta sənədləri hazırlayanları ifşa edəcəklərsə, çox gözəl. Amma bəzi sualların qoyuluşundan, bəzi yanaşmalardan hiss olunur ki, məsələnin mahiyyətini qoyub Müsavat Partiyasına müəyyən təzyiqlər etmək istəyirlər. Görünür, hakimiyyət Müsavat Partiyasının ölkədə və dünyada fəallaşmasından narahat olub. Suallar elədir ki, onun ardınca saxta sənədləri verənlərin ifşası da mümkündür, Müsavata təzyiqlər də. Hansı olacaq, bunu zaman göstərəcək”.
Arif Hacılı jurnalistlərə deyib ki, Baş Prokurorluğun Ağır Cinayətlərə Dair İşlər üzrə İstintaq İdarəsində dindirilməsini partiyaya təzyiq kimi dəyərləndirir: “Partiyanın keçmiş və indiki rəhbərliyini dindirməyə cəlb etməklə bu təzyiqləri cəmiyyətə nümayiş etdirirlər”.
Müsavat başqanı qeyd edib ki, dindirmədə konkret kimlərin necə mühacir statusu alması və bu kimi sualları cavablandırıb. O, dindirmələrin həm də vətəndaş fəallığına qarşı yönəldiyini bildirib.
Fevralın 25-də Müsavat başqanının müavini Gülağa Aslanlı da bu iş üzrə ifadə verib.
