Baş həkim həbs edilib
Bakı Şəhər Narkoloji Dispanserinin baş həkimi Hüseyn Həsənov həbs edilib.
Novator.az Baş Prokurorluğun mətbuat xidmətinə istinadla xəbər verir ki, Hüseyn Həsənov Cinayət Məcəlləsinin 311.1-ci (rüşvət alma) maddəsi ilə ittiham olunur. Onun barəsində məhkəmənin qərarı ilə həbs qətimkan tədbiri seçiləndən sonra baş həkim səhiyyə nazirinin əmri ilə tutduğu vəzifədən azad edilib.
Baş Prokurorluğun mətbuat xidmətinin yaydığı məlumata görə, Bakı Şəhər Narkoloji Dispanserində vətəndaşlardan qeydiyyatda olub-olmamaları barədə arayış verilməsi üçün pul istənilməsi barədə 161 nömrəli “Qaynar xətt” əlaqə mərkəzinə müraciət daxil olub. Müraciəti Baş prokuror yanında Korrupsiyaya Qarşı Mübarizə Baş İdarəsi və Səhiyyə Nazirliyi araşdırıb. Hüseyn Həsənovun 2017-ci ilin yanvar-fevral aylarında narkoloji xəstəliklə əlaqədar qeydiyyatda olub-olmamaları barədə arayışların verilməsi müqabilində ayrı-ayrı şəxslərdən ümumilikdə 3190 manat məbləğində pulu rüşvət kimi tələb edib almasına şübhələr üçün əsaslar olduğundan Korrupsiyaya Qarşı Mübarizə Baş İdarəsində cinayət işi başlanıb.
Cinayət işi üzrə təqsirli şəxslərin tam dairəsinin müəyyənləşdirilərək məsuliyyətə cəlb edilmələri istiqamətində istintaq-əməliyyat tədbirləri davam etdirilir.
