Vitse-prezident məsələsi: Qulamhüseyn Əlibəylinin şərhi
Hüquqşünas, Aydınlar Partiyasının sədri Qulamhüseyn Əlibəyli Novator.az-ın vitse-prezidentlərin statusu ilə bağlı sualını cavablandırıb. Söhbət vitse-prezidentin birinci vitse-prezident statusu almasının necə tənzimlənməsi məsələsindən gedir
Konstitusiyanın 105-ci maddəsinə görə, prezident vaxtından əvvəl vəzifədən getdikdə yeni prezident seçilənədək prezident səlahiyyətlərini birinci vitse-prezident icra edir. Bu müddət ərzində birinci vitse-prezident istefa verdikdə, səhhətinə görə öz səlahiyyətlərini icra etmək qabiliyyətini tamamilə itirdikdə prezidentin müəyyən etdiyi ardıcıllıqla vitse-prezident birinci vitse-prezident statusu almış olur və prezidentin səlahiyyətlərini icra edir.
Fevralın 21-də Mehriban Əliyeva birinci vitse-prezident təyin edilib.
Qulamhüseyn Əlibəyli hesab edir ki, digər vitse-prezidentlər ikinci, üçüncü kimi sıralanmayacaq: “Sədəcə olaraq bir neçə şəxs vitse-prezident təyin olunacaq və prezident ayrıca sərəncamla konstitusiyada nəzərdə tutulmuş hal baş verdikdə onların hansı ardıcıllıqla birinci vitse-prezident statusu almaqla prezident səlahiyyətlərini yerinə yetirəcəyini müəyyən edəcək”.
Hüquqşünas qeyd edib ki, sərəncamı təxminən bu məzmunda təsəvvür etmək olar:
– Müəyyən edilsin ki, konstitusiyanın 105-ci maddəsinin 2-ci hissəsində nəzərdə tutulmuş hal baş verdikdə vitse-prezident aşağıdakı ardıcıllıqla birinci vitse-prezident statusu almaqla prezident səlahiyyətlərini icra edir: birinci vitse-prezident – adı, ikinci vitse-prezident – adı və s.
