Türkiyə ekologiyanı çirkləndirən stansiyalardan can qurtarmağa çalışır
Türkiyə hökuməti ekoloji çirklənməyə səbəb olan, ətraf mühitə zərər vuran, tüstülü-dumanlı kömürlə işləyən termik stansiyalardan can qurtarmaq üçün addımlar atır.
Novator.az xəbər verir ki, hökumət 21 ildən çoxdur reallaşdıra bilmədiyi onlarca layihəyə start verməyi qərara alıb.
Türkiyənin ekoloji nəşri olan “Yeşil qazete” yazır ki, alternativ yolla elektrik enerjisi alınması üçün əlaqədar təşkilatlara mühüm tapşırıqlar verilib.
Qəzet yazır ki, Silivri, Tekirdağ və Çərkəzköy kimi bölgələrdə yerləşən, atmosferə zərərli maddələr ixrac edən bəzi stansiyaların fəaliyyətinə artıq xitam verilib, bu və digər bölgələrdə yeni layihələrə başlanıb.
Bir sıra mütəxəssislər köhnə stansiyaların bazasında yeni elektrik enerjisi emal edən obyektlərin quraşdırılmasını da təklif edir.
Yaxın zamanda Türkiyə ərazisində Hidroelektrik (HES), həmçinin külək enerji ilə işləyən (RES) stansiyalar tikiləcək. Bu yöndə bəzi işlər görülüb. Sözügedən stansiyalar Ankara, Çanaqqala, Tekirdağ, Trabzon, Tokat, Yozqat, Amasiya, Adıyaman kimi şəhər və vilayətləri əhatə edəcək.
