Ölkədə 590 hemodializ aparatı var
Hazırda ölkənin 38 hemodializ mərkəzində 590 hemodializ aparatı var. Səhiyyə Nazirliyi bildirir ki, ümumilikdə 3 min 111 xəstə (1273-ü paytaxtda, 1838-i isə regionlarda) tam dövlət hesablı hemodializlə təmin olunub.
Xəstələrə 71 adda dərman və tibbi ləvazimat verilir. Xroniki Böyrək Çatışmazlığı proqramı üzrə 679 böyrəkköçürülmüş xəstə 13 adda dərman preparatını dövlət hesabına alır.
Xroniki böyrək çatışmazlığı (XBÇ) və ya böyrəklərin xroniki xəstəliyi müxtəlif səbəblərdən böyrəklərin funksiyasının tədricən itməsi və təkrar bərpa olunmaması ilə nəticələnən patoloji haldır. Xəstəliyin ilk mərhələlərində dərman müalicəsi ilə böyrək çatışmazlığının sonrakı inkişafının və gözlənilən ağırlaşmaların qarşını almaq mümkün olur. Konservativ müalicə effektsiz olduqda böyrəklərin artıq itirilmiş funksiyalarını əvəz edə biləcək hemodializ, periton dializi və böyrəkköçürmə kimi müalicə üsulları tətbiq edilir.
Hemodializlə müalicə qanın süni böyrək aparatı ilə orqanizmdən kənarda təmizlənməsidir. Qan dializator adlanan xüsusi filtrdən keçməklə orqanizmdə toplanmış azot qalıqlarından, artıq elektrolitlərdən, izafi mayedən təmizlənməklə yenidən xəstənin bədəninə qayıdır. Bu prosedura 3-4 saat davam edir və xəstənin yeganə müalicə üsulu olduğu üçün həftədə 3 dəfə olmaqla bütün həyatı boyu davam edir.
