“Prezidentin müəyyən etdiyi ardıcıllıq” nə deməkdir?
Konstitusiyanın 105-ci maddəsinə görə, prezident vaxtından əvvəl vəzifədən getdikdə yeni prezident seçilənədək prezident səlahiyyətlərini birinci vitse-prezident icra edir. Bu müddət ərzində birinci vitse-prezident istefa verdikdə, səhhətinə görə öz səlahiyyətlərini icra etmək qabiliyyətini tamamilə itirdikdə prezidentin müəyyən etdiyi ardıcıllıqla vitse-prezident birinci vitse-prezident statusu almış olur və prezidentin səlahiyyətlərini icra edir.
Vitse-prezidentin birinci vitse-prezident statusu alması necə tənzimlənə bilər? Konstitusiyada “prezidentin müəyyən etdiyi ardıcıllıq” hökmünün yer alması o deməkdirmi ki, ikinci, üçüncü, dördüncü, beşinci… vitse-prezidentlər olmalıdır?
Hüquqşünas Hafiz Həsənov Novator.az-ın sualına cavabında deyib ki, Azərbaycan kimi ölkə üçün iki vitse-prezident bəs edə bilər: “Ancaq bütün hallarda vitse-prezidentlərin təyinatları iş yükü və vəzifələrin icrası baxımından əsaslandırılmalı, onların müvafiq sahələr üzrə funksiyaları dəqiqləşdirilməlidir. Ana qanunda vitse-prezidentlik institutu ilə bağlı geniş normalar təsbit olunmadığından bu barədə ayrıca qanunun qəbuluna ehtiyac var.
Deyilə bilər ki, məsələ ali icra hakimiyyətinin səlahiyyətində olduğu üçün bütün bunları prezident müəyyən edəcək. Ancaq prezident aktı ilə bütövlükdə vitse-prezidentlərin statusunu müəyyən etmək mümkünsüzdür və bu cür məsələlər qanunla tənzimlənməlidir.
Konstitusiyanın 105-ci maddəsində “bu müddət ərzində birinci vitse-prezident istefa verdikdə, səhhətinə görə öz səlahiyyətlərini icra etmək qabiliyyətini tamamilə itirdikdə prezidentin müəyyən etdiyi ardıcıllıqla vitse-prezident birinci vitse-prezident statusu almış olur və prezidentin səlahiyyətlərini icra edir” normasındakı “prezidentin müəyyən etdiyi ardıcıllıqla” ifadəsi göstərir ki, ardıcıllıq vitse-prezidentlər təyin edilərkən müəyyən olunacaq. Ya da bu, ayrıca aktla həllini tapacaq”.
