Şirkət 400 minə yaxın müştəriyə külək enerjisi satmağı planlaşdırır
Finlandiyanın EKOenerji Fondunun dəstəyi ilə bu ölkənin nüfuzlu “Helen” şirkəti dünya bazarında geniş miqyasda külək enerjisi dövriyyəsinə başlamağı qərara alıb.
Novator.az xəbər verir ki, şirkət bu il 400 minə yaxın müştərisinə küləkdən alınan təbii enerji satmağı planlaşdırır.
“Helen”in rəhbəri Hanna Verajankorva deyib ki, bu yenilik onların enerji tərəfdaşları üçün gözəl bir şansdır.
EKOenerji Fondunun layihə rəhbəri Steven Vanholme də bu işbirliyindən çox razı qaldıqlarını söyləyib: “Məşhur “Helen” şirkətinin sıramıza qatılması gözəl və sevindirici xəbərdir. Məhsullarımız bütün Avropaya, hətta Çinə gedib çıxacaq. Başlanğıc nöqtə isə, sözsüz ki, Finlandiyadır. Paytaxt Helsinkidə bizə qatılan və dünyaya külək enerjisi satan “Helen” şirkətinin gözəl gələcəyi olduğuna əminəm”.
Finlandiyanın EKOenerji Fondu uzun illərdir fəaliyyət göstərir və nüfuzlu beynəlxalq təşkilatlar sırasında yer tutur. Fondun 30 ölkədə 40-dan çox üzvü var. Təşkilatın məqsədi 100 faiz bərpa olunan enerji mənbələrini aşkar etmək, prosesi reallığa çevirmək və təbii enerjinin istifadəsi standartlarını təşviq etməkdir. Fondun diqqət ayırdığı əsas standartlardan biri təbii enerji alınarkən quşların yuva qurduğu ərazilərə toxunmamaq, təhlükəsizlik qaydalarına ciddi riayət etməkdir.
EKOenerji biznes təşkilatı olmadığından satışdan cüzi gəlirlə kifayətlənir. Bu fond pullarını faktiki olaraq təmənnasız qaydada Finlandiyada, eləcə də xaricdə enerji layihələrinə xərcləyir.
