Kür və Arazda biogen maddələrin miqdarı normanı bir neçə dəfə aşıb
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin onların qollarının çirklənmə vəziyyətini öyrənmək üçün fevralın ikinci ongünlüyünü əhatə edən monitorinq keçirib.
Novator.az xəbər verir ki, monitorinqin nəticələrinə əsasən, Kür çayında suyun sərfi birinci ongünlüyə nisbətən artıb.
Monitorinq zamanı Gürcüstan və Ermənistan ərazilərindən axıdılan məişət tullantılarının, bu ərazilərə məxsus sənaye müəssisələrindən su obyektlərinə tökülən çirkab suların təsiri də araşdırılıb. Nəticələr əsasında Kür çayı və onun qollarında biogen maddələrin miqdarının norma həddindən artıq olduğunu müəyyən edilib.
Monitorinqin nəticələrinə görə, Şıxlı-2 məntəqəsində suyun tərkibindəki spesifik çirkləndirici fenollar yol verilən qatılıq həddini 4.4, Ağstafaçayda 4, Ağstafaçay su anbarında isə 3.4 dəfə aşıb.
Araz çayı üzrə Horadizdə fenollar 2.4, Şahsevən-1-də 2.7, Bəhramtəpə məntəqəsində isə 2.3 dəfə çoxalaraq yol verilən qatılıq həddini keçib.
Kür və Araz çayları üzrə bütün məntəqələrdə mis birləşmələrinin norma daxilində olduğu müşahidə edilib.
