İlk xarici təbrik Ərdoğandan gəldi
Fevralın 21-də Türkiyə prezidenti Rəcəb Teyyub Ərdoğan Azərbaycanın dövlət başçısı İlham Əliyevə zəng edib. O, Mehriban Əliyevanın birinci vitse-prezident təyin edilməsi ilə bağlı təbriklərini çatdırıb. Türkiyə prezidenti Mehriban Əliyeva ilə də danışaraq onu təbrik edib, yüksək dövlət vəzifəsindəki fəaliyyətində uğurlar arzulayıb.
Prezident İlham Əliyev xanımı Mehriban Əliyevanı fevralın 21-də birinci vitse-prezident təyin edib. Azərbaycan Konstitusiyasına əsasən, Mehriban Əliyeva ölkənin ikinci ali vəzifəli şəxsi statusu alıb.
Novator.az xatırladır ki, vitse-prezidentlik institutu Azərbaycan Konstitusiyasına ötən il sentyabrın 26-da keçirilmiş referendumda daxil edilib. Həmin yeniliyə görə, prezident vaxtından əvvəl vəzifədən getdikdə 60 gün müddətində növbədənkənar prezident seçkisi keçirilir. Yeni prezident seçilənədək prezident səlahiyyətlərini birinci vitse-prezident icra edir. Əvvəllər bu səlahiyyət baş nazirdə idi.
Mehriban Əliyeva 1964-cü ildə Bakıda doğulub. 1-ci Moskva Dövlət Tibb İnstitutunu bitirib. 2004-cü ildən Heydər Əliyev Fondunun prezidenti, 2005-ci ildən Milli Məclisin deputatı, 2013-cü ildən Yeni Azərbaycan Partiyası sədrinin müavinidir.
