Ermənistanın xarici işlər naziri Rusiyadan orden aldı
Ermənistanın xarici işlər naziri Edvard Nalbandyan Rusiyanın “Dostluq” ordeni ilə təltif olunub. Novator.az-ın məlumatına görə, ordeni Rusiyada rəsmi səfərdə olan Edvard Nalbandyana rusiyalı həmkarı Sergey Lavrov fevralın 22-si Moskvada təqdim edib.
1956-cı ildə Ermənistanda anadan olan Edvard Nalbandyan 1978-ci ildə Moskva Dövlət Beynəlxalq Əlaqələr İnstitutunu, 1988-ci ildə SSRİ Milli Elmlər Akademiyasının Şərqşünaslıq İnstitutunun aspiranturasını bitirib.
1978-1983-cü illərdə SSRİ-nin Liviya səfirliyində, 1983-1986-cı illərdə SSRİ Xarici İşlər Nazirliyində çalışıb. 1986-1992-ci illərdə Misir səfirliyində (əvvəl SSRİ, sonra Rusiyanın) müşavir vəzifəsində çalışıb.
1992-ci ildən Ermənistanı Misirdə, Mərakeşdə, Omanda təmsil edib. 1999-cu ildən Fransada səfir olub. Xarici işlər naziri postuna 2008-ci ildə gətirilib.
