6 lehinə, 1 əleyhinə: “referendum” oyunu bitir
Azərbaycanın Qarabağ bölgəsinin işğaldakı hissəsində fevralın 20-də keçirilmiş qanunsuz “konstitusiya referendumu”nun ilkin nəticələri təsdiqlənib. Novator.az-ın məlumatına görə, işğalçı rejimin yaratdığı mərkəzi seçki qurumunun 6 üzvü ilkin nəticələrin təsdiq olunmasına səs verib, 1 nəfər bunun əleyhinə çıxıb.
Qeyri-qanuni aksiyaya qatılan 69 min 570 nəfərin (87,6%) “konstitusiya”da yeniliklərə tərəfdar çıxdığı bildirilir. 7686 nəfər isə dəyişikliklərə qarşı olub. Yekun nəticələr fevralın 23-də elan ediləcək.
Yeni “konstitusiya” layihəsinə görə, bölgənin adı dəyişir. Separatçı rejim “Dağlıq Qarabağ Respublikası” adını ikinci plana keçirir, “Arsax Respublikası” əsas ad olur, işğalçı rejim “prezident respublikası”na çevrilir.
Dağlıq Qarabağ vilayəti 1991-ci il sentyabrın 2-də özünü müstəqil dövlət elan edib. Ermənistan Silahlı Qüvvələri bu bölgəni və daha 7 rayonu zəbt edib.
