Uşaqlar üçün ekoloji laboratoriya təlimi təşkil olunub
IDEA İctimai Birliyi və “Sevimli bala” təşkilatının birgə həyata keçirdiyi “Uşaqlar üçün ekoloji laboratoriya” layihəsi çərçivəsində IDEA-nın Resurs Mərkəzində bu ilin növbəti laboratoriya təlimi keçirilib.
Fevral laboratoriyası təbiətə sevgi mövzusuna həsr olunub. Mövzuya uyğun olaraq, təlim zamanı “kiçik ekoloqlar”a canlı və cansız təbiət, təbiətin mühafizəsinin əsas prinsipləri, ekosistem, heyvanların təsnifatı və onların nəslinin tükənmə səbəbləri və s. barədə məlumat verilib. Daha sonra uşaqlar Azərbaycanın Qırmızı Kitabı ilə tanış olublar və ora daxil olan heyvanlar haqqında maraqlı faktlar öyrəniblər.
Təlimin gedişində “kiçik ekoloqlar” bir sıra laboratoriya sınaqlarının keçirilməsində iştirak edib, onların geniş marağına səbəb olan “təbiəti qoruyaq” adlı təcrübə əsnasında Azərbaycanın qoruqları və milli parkları haqqında məlumatlarla tanış olublar.
Təlimin sonunda IDEA İctimai Birliyi və “Sevimli Bala” təşkilatı iştirakçılara xatirə hədiyyələri təqdim edib.
