Telefona görə öncədən ödəniş sisteminin detalları
Bakı Telefon Rabitəsi İstehsalat Birliyi (BTRİB) sabit (stasionar) telefon xidməti üzrə öncədən ödəmə sisteminin detallarını yayıb. Açıqlamaya görə, martın 1-dən sabit (stasionar) telefon istifadəçiləri hər ayın 5-dək telefon borcunu öncədən ödəməli olacaq. Ödəniş edilmədiyi təqdirdə ayın 6-dan 101, 102, 103 və 112 qısa nömrələrə zəng imkanı istisna olmaqla xidmət birtərəfli qaydada dayandırılacaq və abunəçilər yalnız daxil olan zəngləri qəbul edə biləcəklər. Sonrakı bir ay ərzində borc ödənilmədiyi halda telefon şəbəkədən çıxarılacaq.
Şəbəkədən çıxarıldıqdan sonra iki ay ərzində (borcun yaranmasından 4 ay) abunəçi iki ayın abunə və istifadə edilmiş xidmətlərin haqqını ödəyərək telefon xidmətini bərpa edə bilər. Əks halda abunəçi ilə bağlanan müqaviləyə xitam veriləcək. Abunəçi telefon xidməti üçün müraciət edərsə, telefon çəkilişi tarifinə uyğun olaraq ödəniş (30 manat) etməli olacaq.
Müqaviləyə xitam verildikdən sonra 2 ay ərzində nömrə digər abunəçilərə satılmır, yəni həmin müddətdə yenidən müraciət edən abunəçi əvvəlki nömrəsini əldə edə bilər. BTRİB abunə haqqını ödəməyən abunəçiyə yarım il müddətində 2 aylıq abunə haqqını və istifadə etdiyi xidmətlərə görə ödəniş edərək telefondan yenidən istifadə imkanı yaradır.
