İsraildə plastik tullantıdan neft alınır
İsrailin Ətraf Mühitin Mühafizəsi Nazirliyinin Ramat-Xovev şəhərində inşa etdirdiyi zavodda plastik tullantılardan neft alınır.
İsraildə plastik tullantıların emal üçün daşınmasına yardım edən bu zavodun tikilməsi həm də regionda ekoloji problemin həllinə yardım göstərə bilər. Ecosoil.bsu.edu.az İsrailin “TBO” jurnalına istinadla bildirir ki, zavodda 1 ton plastikdən 600 kiloqram neft əldə olunur, həmçinin plastik bağlamalar, müxtəlif oyuncaq və mebel materialları da emal edilir.
Ramat-Xovev şəhərində yerləşən zavodun rəhbərliyi bəyan edib ki, bu, dünyada ilk və analoqu olmayan texnoloji layihədir.
Zavodun rəhbəri görülən işlər barədə bunları bildirib: “Biz plastik tullantıları alıb onu neftə çeviririk və neft emalı zavodlarına göndəririk. Belə bir texnologiya sayəsində İsrail dövləti həm də xaricdən gələn neft tələbatını azalda biləcək”.
Zavod rəhbəri vurğulayıb ki, onlar illərlə zibilxanalarda qalan plastik tullantılardan istifadə etməyi yaxşı bacarırlar, hətta zibilin min yaşı olsa da emala problem yaratmayacaq.
