Qanunsuz aksiyaya nə qədər adam cəlb olunub?
Fevralın 20-si Azərbaycanın işğal altındakı torpaqlarında qanunsuz “konstitusiya referendumu” keçirilir. Novator.az bildirir ki, işğalçı rejim qeyri-qanuni aksiya üçün siyahılara 102 min 757 nəfərin adını daxil edib. Dağlıq Qarabağda yaşayanların 69 faizinin səsvermə hüququ olduğu açıqlanıb.
İşğal zonasında 11 dairə üzrə 280 məntəqə qurulduğu, daha bir məntəqənin Ermənistanın paytaxtı Yerevanda açıldığı xəbər verilir.
Erməni mənbələri “referendum”u 104 xarici müşahidəçinin izlədiyini iddia edir. Onların arasında Avropa Parlamentinin deputatlarının da olduğu bildirilir.
“Referendum”a çıxarılmış “konstitusiya” layihəsinə görə, bölgənin adı dəyişir. Separatçı rejim “Dağlıq Qarabağ Respublikası” adını ikinci plana keçirir, “Arsax Respublikası” əsas ad olur.
Yeni “konstitusiya” layihəsi işğalçı rejimin “prezident respublikası”na çevrilməsini nəzərdə tutur. “Ümumxalq seçkisi”ndə 5 il müddətinə seçilən “prezident” icra hakimiyyətinə rəhbərlik edəcək.
Dağlıq Qarabağ vilayəti 1991-ci il sentyabrın 2-də özünü müstəqil dövlət elan edib. Ermənistan Silahlı Qüvvələri Dağlıq Qarabağdan əlavə 7 rayonu zəbt edib. İşğalçı rejim 1991-ci ildən indiyəcən seçki adı altında 19 qanunsuz aksiya keçirib: 6 “parlament seçkisi”, 5 “prezident seçkisi”, 6 “bələdiyyə seçkiləri”, 2 “referendum”.
