Məşğulluq proqramına dair yeni rəqəmlər
Əmək və Əhalinin Sosial Müdafiəsi Nazirliyi bildirir ki, özünüməşğulluq proqramı çərçivəsində 103 ailəyə fərdi təsərrüfatlarını qurmaları üçün aktivlər (mal və materiallar) verilib. Rəsmi məlumata görə, ilk tədbir Tərtərdə həyata keçirilib, həmin rayonda 11 aztəminatlı ailə biznes imkanlarına yiyələnmək üçün mal və materiallarla təmin edilib.
Həmçinin Laçından 12, Hacıqabuldan 8, Ağcabədidən 10, Beyləqandan 14, Xocavənddən 10, Qəbələdən 9, İsmayıllıdan 13, Göyçaydan 11, Ağsudan olan 5 ailə özünüməşğulluq fəaliyyətinin təşkili üçün aktivlərlə təmin olunub.
Prezidentin 7 aprel 2016-cı il sərəncamına əsasən icra olunan özünüməşğulluq proqramı ailələrin fərdi təsərrüfatlarını, fərdi bizneslərini qurmaqla özünüməşğulluğuna, əmək potensiallarının reallaşdırılması yolu ilə gəlirlərini artırmalarına, digər tərəfdən kiçik və orta sahibkarlığın inkişafına xidmət edir.
Özünüməşğulluq proqramı çərçivəsində təqribən 1500 ailəyə fərdi təsərrüfatlarının yaradılması üçün mal və materiallar verilməsi, beləliklə, ailə bizneslərinin qurulması yolu ilə onların əmək qabiliyyətli üzvlərinin özünüməşğulluğuna şərait yaradılması nəzərdə tutulub.
