İqtisadi göstəricilər: nə dəyişib?
Novator.az Azərbaycanın yanvar ayına olan bəzi iqtisadi göstəricilərini 2016-cı ilin analoji rəqəmləri ilə müqayisə edib.
Rəsmi hesabata görə, 2017-ci ilin yanvar ayında Azərbaycanın ticarət əməliyyatlarının həcmi ötən ilin ilk ayına nisbətən 16,79 faiz artıb. İdxal əməliyyatlarında 3,64 faiz, ixracda 25,71 faiz artım olduğu qeyd edilir.
2016-cı ildə isə xarici ticarətin həcmi 2015-ci illə müqayisədə 19,46% azalmış, idxal əməliyyatlarında 7,42%, ixrac əməliyyatlarında 28,17% geriləmə olmuşdu.
Bu ilin yanvarında Azərbaycanın ixracının 82,49 faizi xam neftin payına düşüb. Neft məhsulları ümumi ixracın 2,68 faizini, təbii qaz 3,35 faizini təşkil edib.
2016-cı ildə ixracın 71,14 faizi xam neft, 4,48 faizi neft məhsulları, 10,62 faizi təbii qaz olub.
Rəsmi məlumata əsasən, 2017-ci ilin yanvarında ölkədə əvvəlki ilin müvafiq dövrünə nisbətən 0,8 faiz çox ümumi daxili məhsul istehsal olunub.
2016-cı ildə Azərbaycanda ümumi daxili məhsul istehsalı 2015-ci ilə nisbətən 3,8% düşmüşdü.
2017-ci ilin ilk ayında sənaye müəssisələri və bu sahədə fəaliyyət göstərən fərdi sahibkarlar əvvəlki ilin müvafiq dövrü ilə müqayisədə 1 faiz çox sənaye məhsulu istehsal edib. Sənayenin qeyri-neft sektorunda məhsul istehsalı 13 faiz artıb, neft sektorunda isə 1 faiz azalıb.
Kənd təsərrüfatında ümumi məhsulun 3,5 faiz artdığı vurğulanır.
2017-ci ilin yanvar ayında əsas kapitala 2016-cı ilin müvafiq dövrü ilə müqayisədə 2,1 faiz az vəsait yönəldilib.
Əvvəlki ilin müvafiq dövrü ilə müqayisədə yük daşınması 4,3 faiz, sərnişin daşınması 2,7 faiz artıb.
2016-cı il üzrə makroiqtisadi göstəricilərə gəlincə, sənaye istehsalı 0,4 faiz azalmış, kənd təsərrüfatının ümumi məhsulu 2,6 faiz artmış, ölkəyə 2015-ci illə müqayisədə 26,1 faiz az vəsait yönəldilmişdi.
Əvvəlki illə müqayisədə yük daşınması 0,1 faiz azalmış, sərnişin daşınması isə 2 faiz artmışdı.
