Seysmoloji Xidmət Mərkəzinin Elmi-Texniki Şurası toplanıb
Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin Elmi-Texniki Şurasının növbəti iclası keçirilib.
Mərkəzdən Novator.az-a verilən məlumata görə, iclasda zəlzələ ocaqlarının dinamikası şöbəsinin müdiri, geologiya-mineralogiya üzrə fəlsəfə doktoru S.Kazımova “Zəlzələlərin ocaq mexanizmlərinə əsasən, Azərbaycanın seysmogen sahələrində tektonik hərəkətlərinin tipləri” mövzusunda məruzəsini təqdim edib. İclasda iştirak edən alimlər məruzəni maraqla qarsalayıblar.
Akademik H.Quliyev, akademik P.Məmmədov, geologiya-mineralogiya elmlər doktoru T.Məmmədli, geologiya-mineralogiya üzrə fəlsəfə doktoru Ş.Musayev çıxış edərək müzakirə olunan mövzu ətrafında fikirlərini açıqlayıblar. Elmi diskussiya şəraitində keçən müzakirələrin nəticəsi olaraq alimlər bu istiqamətdə tədqiqatların daha da genişləndirilməsini tövsiyə ediblər.
İclasda, həmçinin Respublika Seysmoloji Xidmət Mərkəzində çalışan bakalavr, magistr, dissertant və mühəndis-texniklərə 2017-ci ildə keçirilməsi nəzərdə tutulan ixtisas və xarici dil kursları üzrə tədris proqramının, elmi seminarların mövzularının, elmi-tədqiqat işlərinin planının təsdiqi, o cümlədən Elmi-Texniki Şuranın tərkibində qismən dəyişiklik edilməsi məsələlərinə baxılıb.
Şuranın iclasına Respublika Seysmoloji Xidmət Mərkəzinin baş direktoru, Milli Elmlər Akademiyasının müxbir üzvü Qurban Yetirmişli sədrlik edib.
