Ermənistanda seçkiyə 9 siyasi qüvvə qatılıb
Ermənistanın Mərkəzi Seçki Komissiyası fevralın 16-da parlament seçkisinə qatılan partiya və bloklardan sənədlərin qəbulunu başa çatdırıb.
Parlament seçkisi aprelin 2-də keçiriləcək. Qeydiyyat fevralın 26-da bitir, seçkiqabağı təşviqat martın 5-dən 31-nə qədər davam edəcək.
Novator.az-ın məlumatına görə, MSK-ya 9 siyasi qüvvə sənəd təqdim edib.
Prezident Serj Sərkisyanın lider olduğu hakim Respublika Partiyasının namizədləri siyahısına müdafiə naziri Vigen Sərkisyan başçılıq edir.
Sabiq prezident Levon Ter-Petrosyan Erməni Milli Konqresi ilə Xalq Partiyasının qurduğu blokun siyahısında birincidir.
Keçmiş müdafiə naziri Seyran Ohanyan seçkiyə sabiq xarici işlər nazirləri Raffi Ovannisyan və Vardan Oskanyanla bir blokda qatılır. Namizədlər siyahısında Seyran Ohanyan öndə durur.
Çiçəklənən Ermənistan Partiyasına rəhbərlik edən iş adamı Qaqik Sarukyan “Sarukyan” adlı blokun namizədlər siyahısında ilk sıradadır.
MSK-ya Kommunist Partiyası, Daşnaksütun Partiyası, Azad Demokratlar Partiyası, “Erməni dirçəlişi” və “Gediş” blokları da sənəd təqdim edib.
Ermənistanın 2015-ci ilin dekabr ayında qəbul edilmiş yeni konstitusiyası ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament 7 il müddətinə seçəcək.
