Ter-Petrosyan seçkiyə qatıldı
Ermənistanın birinci prezidenti Levon Ter-Petrosyan aprelin 2-də keçiriləcək parlament seçkisinə qatılıb. Novator.az-ın məlumatına görə, Ter-Petrosyan lideri olduğu Erməni Milli Konqresi ilə Xalq Partiyasının qurduğu blokun proporsional siyahısından namizəd göstərilib. Onun adı siyahıda birinci yerdədir. Siyahıda ikinci Xalq Partiyasının lideri Stepan Dəmirçyanın adı gəlir.
Ter-Petrosyan Dağlıq Qarabağın Azərbaycandan qoparılmasının əsas ideloqlarından sayılır. O, 1990-98-ci illərdə Ermənistana rəhbərlik edib (əvvəl parlamentin sədri, daha sonra prezident kimi). 1998-ci ilin fevralında Levon Ter-Petrosyan Dağlıq Qarabağ münaqişəsinin mərhələli həll planına razılaşdığı üçün istefa verməyə məcbur edilib.
Stepan Dəmirçyan SSRİ dövründə Ermənistana rəhbərlik etmiş, 1999-cu ildə parlament sədri olarkən terror aktında öldürülmüş Karen Dəmirçyanın oğludur.
Ermənistanın Mərkəzi Seçki Komissiyası fevralın 16-da parlament seçkisinə qatılan partiya və blokların sənədlərinin qəbulunu başa çatdırmalıdır. Qeydiyyat üçün son müddət fevralın 26-sıdır.
Seçkiqabağı təşviqat kampaniyası martın 5-dən 31-nə qədər davam edəcək.
Ermənistanın 2015-ci ilin dekabr ayında qəbul edilmiş yeni konstitusiyası ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament 7 il müddətinə seçəcək.
