Neft hasilatında nə qədər geriləmə var?
Neft İxrac edən Ölkələr Təşkilatının (OPEK) xam neft istehsalı yanvar ayında gündəlik 890 min barrel azalaraq 32 milyon 140 min barrel olub. Hasilatın azaltması ilə OPEK-in qlobal neft istehsalındakı payı əvvəlki aya nisbətən 33,5 faizə geriləyib.
OPEK-in 13 üzvü var: Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, Əlcəzair, Liviya, Nigeriya, Qabon, Anqola, Ekvador, Venesuela.
Yanvarda qlobal neft təklifi əvvəlki aya görə gündəlik 1 milyon 290 min azalaraq 95 milyon 820 min barrel təşkil edib. Neft təklifi 2016-ci ilin yanvar ayına nisbətdə isə 460 min barrel azalıb.
Ötən ay OPEK üzrə xam neft hasilatı ən çox Nigeriya, Liviya və İranda artıb, ən böyük azalma isə Səudiyyə Ərəbistanı, İraq və Birləşmiş Ərəb Əmirliklərində baş verib.
AZƏRTAC-ın 16 fevral məlumatına görə, Nyu-York birjasında “Layt” markalı neftin bir barreli 53,05 dollara, London birjasında “Brent” markalı neftin bir barreli 55,74 dollara satılır. “AzəriLayt” markalı neftin bir barreli isə 56,97 dollara təklif edilir.
Novator.az xatırladır ki, iri neft ölkələrini birləşdirən OPEK yanvarın 1-dən gündəlik hasilatı 1,2 milyon barrel, qeyri-OPEK ölkələri 558 min barrel azaldıb. Azərbaycan gündəlik hasilatı 35 min barrel azaltmağa razı olub.
