Miqrasiya Xidmətinin aylıq hesabatı
Dövlət Miqrasiya Xidməti yeni hesabat yayıb. Rəsmi məlumata görə, yanvar ayında 1667 əcnəbinin Azərbaycanda olma, müvəqqəti və daimi yaşama qaydalarına əməl etmədən inzibati qanunvericiliyin tələblərini pozması üzə çıxıb: “17 nəfərin müvəqqəti və ya daimi yaşamaq üçün əsas verən sənədləri yenisi ilə əvəzlənib, 204 nəfərin ölkə ərazisində yaşaması leqallaşdırılıb, 1121 əcnəbinin Azərbaycan ərazisini 48 saat ərzində tərk etməsi, 325 əcnəbinin inzibati qaydada ölkədən çıxarılması barədə qərarlar qəbul edilib.
Ay ərzində əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı 6902 müraciət daxil olub. Olduğu yer üzrə qeydiyyatla bağlı 49107 əcnəbinin müraciəti qeydə alınıb”.
