Güzəştli kredit: siftə Şəmkirdə oldu
İqtisadiyyat Nazirliyinin Sahibkarlığa Kömək Milli Fondu 2017-ci ilin ilk işgüzar forumunu fevralın 16-sı Şəmkir rayonunda keçirib. 200-ə yaxın sahibkarın iştirakı ilə keçirilən forumda Şəmkir və ətraf rayonlarda fəaliyyət göstərən sahibkarlıq subyektlərinə 270 min manat güzəştli kredit verilib. Rəsmi məlumata görə, kreditlər əsasən heyvandarlıq, üzümçülük, bağçılıq, tərəvəzçilik sahələrin inkişafına yönəldiləcək.
Forumda çıxış edən Sahibkarlığa Kömək Milli Fondunun icraçı direktoru Şirzad Abdullayev bildirib ki, 2016-cı ildə sahibkarlıq subyektləri 190 milyon manat güzəştli kredit alıb: “Bu kreditlər hesabına maliyyələşdirilən layihələrin reallaşdırılması 8100-dən çox yeni iş yerinin açılmasına imkan yaradır. 2017-ci ildə sahibkarlara geri qaytarılan vəsaitlər hesabına 150 milyon manat güzəştli kreditin verilməsi nəzərdə tutulur”.
