Avropa Məhkəməsi Azərbaycana yeni cərimələr kəsib
Fevralın 16-da Avropa İnsan Hüquqları Məhkəməsi Azərbaycandan verilən şikayətlər üzrə bir neçə qərar çıxarıb. Novator.az bildirir ki, vəkil Əsabəli Mustafayev bu haqda məlumat yayıb. Vəkilin bildirdiyinə görə, qərarlar müdafiə etdiyi 10 nəfərin 15 işini əhatə edir. Ərizəçilərin qanunsuz həbsə məruz qalmaları, onların sərbəst toplaşma, ədalətli araşdırma hüquqlarının pozuntusu tanınıb.
Qərarlarda Məcid Məcidliyə 9 min avro, Bayram Bayramov və Məhəmməd Məcidlinin hər birinə 10 min avro, Babək Həsənov, İkram İsrafil, Tural Abbaslı, Hikmət Ağayev, Rövşən Quliyevin hər birinə 12 min avro, Gözəl Bayramovaya 12 min və məhkəmə qərarı ilə ödədiyi 2 min manat cərimənin əvəzi olaraq 1900 avro, Cəmil Hacıyevə 12 min və cərimənin əvəzi olaraq 470 avro, bütün 15 iş üzrə hüquqi xidmətə görə isə 9 min 700 avro təzminat ödənməsi tələb olunub.
Əsabəli Mustafayev Vidadi İsgəndərli haqda da oxşar iş üzrə qərarın elan olunduğunu bildirib. Vidadi İsgəndərli üçün hüquqi xidmətlə birlikdə 13 min 800 avro təzminat kəsilib.
