Təhlükəli sahillər
Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin mütəxəssisləri BP şirkətinin iştirakı ilə dəniz ekoloji ekspedisiyasında iştirak ediblər.
Xəzər dənizinin Azərbaycan ərazisində operatorluq edən “BP-Azərbaycan” şirkətinin “Azəri”, “Çıraq”, “Günəşli” və “Şahdəniz” yataqlarındakı sahələrdən ekspedisiya tərəfindən qrunt və su nümunələri götürülüb. Ötən ilin hər rübü “Çıraq” platformasında monitorinq keçirən Xəzər Kompleks Ekoloji Monitorinq İdarəsinin əməkdaşları qazma əməliyyatlarında istifadə edilən bəzi nümunələr əldə etməklə, qazma məhlulu, şlam nümunələri və platforma ətrafındakı dəniz suyu üzərində laboratoriya şəraitində təhlillər aparıblar.
Nazirlikdən verilən məlumata görə, hesabat dövründə çimərliklərin yay istirahət mövsümünə hazırlığı ilə əlaqədar mütəmadi olaraq keçirilən monitorinqlərin nəticələrinə əsasən Sumqayıt, Səbail rayonunun Şıx və Qaradağ rayonunun Sahil qəsəbəsinin çimərlik ərazisində formalaşan tullantı suları müvafiq norma və standartlara uyğun təmizlənmədən və zərərsizləşdirilmədən dənizə axıdıldığına görə bu ərazilərdə bağırsaq çöpü bakteriyalarının və şərti patogen E.coli-nin miqdarı normadan dəfələrlə artıq müəyyən edilib.
Modul tipli çirkab sutəmizləyici qurğular quraşdırılan ərazilər də tədqiq edilib. Laborator analizlərin nəticələri bu sahələrdə bağırsaq çöpü bakteriyalarının miqdarının normada olduğunu təsdiqləyib.
Monitorinqin nəticələri tədbir görülməsi üçün aidiyyəti qurumlara göndərilib.
