Ölkədə ömür uzunluğu 75,2 yaşa çatıb
Fevralın 15-i Əmək və Əhalinin Sosial Müdafiəsi Nazirliyində Çexiyanın Karlov Universitetinin professoru, beynəlxalq ekspert Tomaş Kuçeranın Azərbaycanla bağlı hazırladığı əhali proqnozları təqdim olunub. Rəsmi məlumata görə, tədbirdə çıxış edən əmək və əhalinin sosial müdafiəsi naziri Səlim Müslümov deyib ki, ölkə əhalisinin sayı 2003-cü illə müqayisədə 17,5 faiz artaraq 2016-cı ilin 1 dekabrına 9 milyon 802 min nəfərə çatıb: “Doğulanların sayı əhalinin hər min nəfərinə hesabı ilə 2003-cü ildəki 14 nəfərdən 2015-ci ildə 17,4 nəfərə qədər artıb. Ölkədə doğulanların sayı 2003-cü ildə 113 467 nəfər olduğu halda 2015-ci ildə bundan 46,5 faiz çox, yəni 166 210 nəfər olub.
Bu müsbət dinamika ölüm səviyyəsinin azalması ilə də müşahidə edilib. Məsələn, 2015-ci ildə ölkədə ölənlərin sayı əhalinin hər on min nəfərinə hesabı ilə 2003-cü ildəki 60 nəfərdən 57 nəfərə qədər azalıb. Yəni il ərzində doğulanların sayı ölənlərin sayını 3 dəfədən çox üstələyir”.
Müslümov ölkədə ölüm səviyyəsinin azalmasının doğulanda gözlənilən ömür uzunluğu göstəricisinin artması ilə müşahidə edildiyini bildirib: “Bu göstərici 2003-də 72,3 yaş (o cümlədən kişilər arasında 69,5 yaş, qadınlar arasında 75,1 yaş) olub, 2015-ci ilin yekunlarına görə isə doğulanda gözlənilən ömür uzunluğu 75,2 yaşa (o cümlədən kişilər üçün 72,7 yaşa, qadınlar üçün isə 77,6 yaşa) yüksəlib. Miqrasiya saldosunda da müsbət dinamika davam edir. 2015-ci ildə bu göstərici +1,1 min nəfər olub”.
