Gürcüstanda əsgərlər istirahət günləri evə buraxılacaq
Gürcüstanın Müdafiə Nazirliyi fevralın 14-də 140 çağırışçını hərbi xidmətə qəbul edib. Bununla da həqiqi hərbi xidmətə çağırış bərpa olunub.
2015-ci ilin yayında həqiqi hərbi xidmət ləğv edilmişdi. Ötən ilin noyabrında qərar dəyişdirilib.
Müdafiə Nazirliyi bildirir ki, həqiqi hərbi xidmət keçmə qaydaları yenilənib. Əvvəllər həqiqi hərbi xidmətə çağırılanlar əsasən hərbi obyektlərin mühafizəsinə cəlb olunur və silahsız qulluq keçirdilər. Yeniliyə əsasən, çağırışçı gənclər 10 həftəlik döyüş hazırlığı keçəcəklər. Əsgərlər istirahət günləri evə buraxılacaq.
Gürcüstanda həqiqi hərbi xidmətə 18 yaşdan 27 yaşadək gənclər çağırılırlar. Həqiqi hərbi xidmətin müddəti 12 aydır. Çağırış ildə iki dəfə (yazda və payızda) həyata keçirilir.
Xəbəri AZƏRTAC yayıb.
