Diplomatlar Cocuq Mərcanlıya baş çəkib
Fevralın 15-də xarici ölkələrin Azərbaycanda akkreditə olunmuş diplomatik nümayəndələri və beynəlxalq təşkilatların rəhbərləri Cəbrayıl rayonunun Cocuq Mərcanlı kəndinə səfər edib. AZƏRTAC xəbər verir ki, 60-a yaxın nümayəndə Cocuq Mərcanlıda həyata keçirilən yenidənqurma və tikinti işləri ilə yaxından tanış olub.
Diplomatları baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov müşayiət edib.
Novator.az bildirir ki, 1993-cü ilin oktyabrında Ermənistan silahlı birləşmələrinin işğal etdiyi kənd 1994-cü il yanvarın 5-də Azərbaycan Ordusunun keçirdiyi Horadiz əməliyyatı zamanı Füzuli rayonunun 22 yaşayış məntəqəsi ilə birgə azad olunub. 2016-cı ilin aprel ayındakı əks-hücumdan sonra Azərbaycan Ordusu ətraf ərazilərə nəzarət edir və Cocuq Mərcanlı kəndində insanların təhlükəsiz yaşaması mümkün olub, dinc əhalinin qayıtması üçün əsaslı yenidənqurma işlərinin başlanmasına şərait yaranıb.
Prezident İlham Əliyev Cocuq Mərcanlı kəndinin bərpasına sərəncamlar verib. Kənddə 50 fərdi yaşayış evinin, məktəb binasının və müvafiq infrastrukturun tikintisi üçün Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4 milyon manat, Cocuq Mərcanlı kəndinə gedən 9 kilometrlik yolun tikintisi məqsədi ilə “Azəravtoyol” Açıq Səhmdar Cəmiyyətinə 4,3 milyon ayrılıb.
