Adambaşına müdafiə xərcləri: Azərbaycanda 146, Ermənistanda 141 dollar
Beynəlxalq Strateji Tədqiqatlar İnstitutu “Hərbi balans-2017” hesabatını açıqlayıb. Hesabatda 171 ölkənin, o cümlədən Azərbaycan və Ermənistanın hərbi potensialı qiymətləndirilir.
Azərbaycanda da, Ermənistanda da 2016-cı ildə ümumi daxili məhsulun 4%-nin müdafiə və təhlükəsizliyə xərcləndiyi bildirilir.
Azərbaycanın müdafiə xərcləri 2016-ci ildə öncəki illərə nisbətən azalıb, 1 milyard 438 milyon dollar olub. 2015-ci ildə bu rəqəm 1 milyard 750 milyon dollar, 2014-cü ildə 2 milyard dollardan çox idi.
Ermənistanın müdafiə xərclərinin ötən il 428 milyon dollar olduğu göstərilir.
Adambaşına düşən müdafiə xərcləri isə Azərbaycanda 146 dollar, Ermənistanda 141 dollardır.
“Azadlıq” radiosunun məlumatına görə, “Hərbi balans-2017”də Azərbaycanın fəal hərbi qüvvələrinin sayının 67 min olduğu deyilir. Ermənistanda bu rəqəm 45 mindir.
Ehtiyatda olan qüvvələr Azərbaycanda 300 min, Ermənistanda 210 mindir.
Azərbaycanın hərbi balansını 2015-2016-cı illərdə 20%-dən çox artırdığı göstərilir. Gürcüstan və Ermənistanda artım 3%-dən 10%-ə qədər olub.
Hesabatda Dağlıq Qarabağ ərazisində 20 minə qədər silahlı qüvvənin olduğu deyilir.
