378 qanun, 465 fərman, 913 sərəncam
2016-cı ildə dövlət başçısı 378 qanun, 465 fərman, 913 sərəncam imzalayıb. Novator.az-ın məlumatına görə, Prezident Administrasiyasının sənədlərlə və vətəndaşların müraciətləri ilə iş şöbəsinin müdiri Süleyman İsmayılov AZƏRTAC-da dərc olunmuş məqaləsində belə yazır.
Şöbə müdiri qeyd edir ki, 2016-cı ildə Azərbaycan regionun əsas iqtisadi güc mərkəzi olub, Cənubi Qafqaz iqtisadiyyatının 75 faizini təşkil edib: “Ümumi daxili məhsulun 65,7 faizi qeyri-neft sektorunun payına düşüb. Ölkə iqtisadiyyatının yeni sahələrinin yaradılması üçün ciddi tədbirlər görülüb, xüsusilə sahibkarlığın inkişafına böyük yardım göstərilib, təkcə Sahibkarlığa Kömək Milli Fondu 1815 sahibkara 120 milyon manatdan artıq güzəştli kredit verib. Ötən il Azərbaycan iqtisadiyyatına 11,7 milyard dollar investisiya qoyulub. Bu investisiyanın 8 milyardı xarici, 3,7 milyardı isə daxili investisiya olub.
2016-cı ildə də iqtisadi siyasətimiz sosial yönümlü olması ilə seçilib. Bütün sosial məsələlərin həllinə nail olunub, 100 mindən çox iş yeri açılıb, maaşlar 7, pensiyalar 8 faiz artıb, vətəndaşlara verilən sosial yardımlar xeyli yüksəlib. Sosial infrastruktur layihələrinin icrası davam etdirilib. Keçən il 485 məktəbin təmiri, 29 yeni məktəbin, 41 xəstəxananın tikintisi və ya təmiri buna əyani sübutdur”.
