Sumqayıt çayı “qaynar nöqtə” olaraq qalır
Bakının üç inzibati ərazisində – Qaradağ, Xəzər, Sabunçu rayonlarının sahil zolağında ekoloji monitorinqlər aparılıb. Araşdırma zamanı çirkli suların dənizə, sahil zolaqlarına axıdıldığı və bərk məişət tullantılarının atıldığı, eləcə də bataqlıq sahələrin yarandığı müşahidə edilib.
Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsindən bildiriblər ki, Sumqayıt inzibati rayonu ərazisində, “Hacı dərəsi”, “Azərboru” kollektoru, Hacı Zeynalabdin Tağıyevin adını daşıyan və “Kimyaçılar” adlanan qəsəbələrdə də araşdırma aparılıb, dənizə axıdılan su nümunələrinin tərkibi öyrənilib. Bu ərazilərdə kimyəvi çirklilik həddinin artdığı, eləcə də ammonium ionun, nitritlərin, sintetik səthi aktiv maddələrin, oksigenə biokimyəvi tələbatın mikrobioloji baxımdan normadan artıq olduğu müəyyən edilib.
Mərkəzin verdiyi məlumata görə, sahildə yerləşən müəssisələrin çaya tökdüyü tullantılar və bu tullantıların Sumqayıtçay vasitəsilə dənizə axması nəticəsində Sumqayıt çayı təhlükə mənbəyi – “qaynar nöqtə” olaraq qalır.
