Senat Trampın iki nazirini təsdiqlədi. İlk istefa da var
ABŞ Senatı daha iki nazirlə bağlı qərar verib. Novator.az-ın məlumatına görə, Senatın 13 fevral iclasında prezident Donald Trampın təqdimatlarına baxılıb və Stiven Mnuçin maliyyə naziri, Devid Şulkin veteranlarla iş naziri postuna təsdiqlənib.
Stiven Mnuçinin namizədliyinin lehinə 53, əleyhinə 47 senator səs verib. Devid Şulkin isə Senatdan yekdilliklə keçib.
ABŞ-ın yeni prezidenti Donald Tramp yanvarın 20-də səlahiyyətlərinin icrasına başlayıb. Senat indiyədək onun komandasının bu üzvlərini də təsdiqləyib: Rayns Pribus – Ağ ev aparatının başçısı, Reks Tillerson – dövlət katibi (xarici işlər naziri), Ceyms Mettis – müdafiə naziri, Con Kelli – daxili təhlükəsizlik naziri, Ceff Seşns – ədliyyə naziri (baş prokuror), Betsi Devos – təhsil naziri, Eleyn Lan Çao – nəqliyyat naziri, Nikki Heyli – ABŞ-ın BMT-dəki daimi nümayəndəsi, Tomas Prays – səhiyyə və sosial xidmətlər naziri.
Fevralın 13-də yayılan başqa bir məlumata görə, prezident Donald Trampın milli təhlükəsizlik üzrə köməkçisi Maykl Flinn vəzifəsindən istefa verib. Bu vəzifənin icrası istefada olan general-leytenant Kit Kelloqqa həvalə olunub.
Maykl Flinnin istefasının Rusiyanın ABŞ-dakı səfiri Sergey Kislyakla əlaqələrlə bağlı olduğu bildirilir. Onun 2016-cı ilin dekabr ayında səfirlə Rusiyaya qarşı tətbiq olunmuş sanksiyaları aradan qaldırmaq müzakirələri apardığı, amma bunu dandığı üzə çıxıb. Maykl Flinn prezidentdən və vitse-prezidentdən üzr istəyərək istefa verib.
