Çıxarış verilən mənzilin nə üstünlükləri var?
Əmlak Məsələləri Dövlət Komitəsi “Kütləvi çıxarış” kampaniyası ilə bağlı yeni məlumat yayıb. Rəsmi açıqlamaya görə, fevralın 11-də keçirilən növbəti kampaniyadan Sabunçu rayonunun Bakıxanov qəsəbəsindəki “Bakıxanov Residence I” yaşayış kompleksinin sakinləri faydalanıb. Yaşayış kompleksinin 40-a yaxın sakini öz mənzillərinə dair hazır çıxarışlar əldə ediblər. Bir qrup sakindən isə çıxarışla əvəz olunması üçün ilkin mülkiyyət sənədləri qəbul edilib.
Novator.az-ın məlumatına görə, komitə qeyd edir ki, çıxarış verilən mənzil dövlətdə qeydiyyata alınan, hüquqi zəmanətli və etibarlı əmlakdır: “Belə əmlak istənilən hüquqi əməliyyatlara (alğı-satqı, girov, bağışlama və s.) rahatlıqla cəlb oluna bilir. Yeni tikilən binalarda mənzillərə çıxarış əldə etmək üçün lazım olan sənədlər bunlardır: istismara qəbul aktı (bina üçün), protokoldan çıxarış və maliyyə arayışı. Vətəndaşlar həmin sənədləri komitənin əməkdaşlarına təqdim etməklə birbaşa ünvanlarda hazır çıxarış əldə edə bilərlər. Xidmətlərin çatdırılması zamanı dövlət rüsumu və xidmət haqqı istisna olmaqla əlavə heç bir ödəniş tələb olunmur”.
