Alimlər: süngərlər “qiyamət”dən sağ çıxacaq
Böyük Britaniyanın Uels Milli Muzeyinin tədqiqatçı əməkdaşları indiyədək bütün ekoloji kataklizmlərdən salamat çıxmış dəniz süngərlərinin indən belə də uzunömürlü olacağı qənaətinə gəliblər.
Novator.az-ın məlumatına görə, alimlər qeyd ediblər ki, əvvəlki kataklizmlər süngərlərdə qismən bioloji dəyişikliklərə səbəb olub, ancaq onlar bir növ kimi özlərini qorumağı bacarıb.
Süngərlər dənizlərdə, okeanlarda yaşayır, müntəzəm olaraq dərinliklərə baş vurur, bədənlərinin hərarətini qorumaqla ən gözlənməz şəraitə belə uyğunlaşa bilir. 443 milyon il öncə baş verən, yer üzündə canlıların 85 faizinin məhvi ilə nəticələnən dəhşətli buzlaşmadan üzü bəri nəsli kəsilməyən süngərlər planetin ən qədim varlıqlarından sayılır.
Bu dəniz canlıları elmə çoxdan məlum olsa da, son illər bəzi ölkələrdə, eləcə də Çində onların yüzə yaxın yeni növü aşkar edilib.
Qeyri-müəyyən hava şəraitinə, atmosfer çirklənməsinə, temperaturun kəskin artıb-azalmasına yüksək dözümlülük nümayiş etdirən dəniz süngərlərinin mürəkkəb orqanizmi, yaşam tərzi, qidalanması, güclü müqaviməti bu canlıların növbəti buzlaşmadan da sağ çıxa biləcəyi qənaətini yaradıb. Ona görə də britaniyalı alimlər süngərlərin “qiyamət günü”ndən də qurtulacağı fikrini irəli sürüblər.
İngiltərənin “Current Biology” jurnalının paylaşdığı məlumatda alimlərin bu fikri, yəni süngərlərin “qiyamət”dən salamat çıxacağı barədə dedikləri həqiqətə çox yaxın ehtimal kimi dəyərləndirilib.
