Vergi orqanlarından iki rəsmi hesabat
Vergi orqanlarına yanvar ayı ərzində daxil olmuş vətəndaş müraciətlərinin hesabatı yayılıb. Novator.az-ın məlumatına görə, Vergilər Nazirliyinin Media və Kommunikasiya Mərkəzinin açıqladığı hesabatda qeyd olunur ki, ay ərzində vergi orqanlarına 7145 müraciət daxil olub, bu da ötən ilin müvafiq dövrü ilə müqayisədə 11% azdır. Müraciətlərin 97,6%-i ərizə, 2,2%-i şikayət, 0,2%-i təklifdir.
Rəsmi hesabata əsasən, müraciətlərin 45,9%-i müxtəlif arayışların alınması, 20,1%-i kameral vergi yoxlamaları, 12,6%-i vergi borcları, 2,4% vergidən yayınma, nağd hesablaşmaların aparılması qaydalarının pozulması, qanunsuz sahibkarlıq fəaliyyəti, 1,4%-i vergi qanunvericiliyinin tətbiqi, 1,3%-i səyyar vergi yoxlamaları, 0,8%-i işlə təmin olunma, 0,5%-i qəbul, 0,3%-i vergi orqanlarının vəzifəli şəxslərinin hərəkəti (hərəkətsizliyi), qalanları digər məsələlərlə bağlı olub.
Bütün müraciətlərə vaxtında baxılıb, onların 70,4%-i müsbət həll olunub.
Hesabat dövründə vergi orqanlarında ümumilikdə 194 vətəndaş qəbul edilib.
Başqa bir rəsmi açıqlamaya görə, yanvar ayında vergi ödəyiciləri dövlət büdcəsinə 544 milyon 849,2 min manat məbləğində vəsait ödəyib və Vergilər Nazirliyi üzrə müəyyənləşdirilmiş proqnoz tapşırıqlarına 112% əməl olunub.
Bu il Vergilər Nazirliyinin xətti ilə dövlət büdcəsinə 7 milyard 510 milyon manat daxilolma proqnozlaşdırılır.
