Sabiq nazir prezident postuna keçir
Almaniya Federal Məclisi fevralın 12-də ölkənin yeni prezidentini seçib. Novator.az-ın məlumatına görə, səsverməyə qatılan 1239 nəfərdən 931-i Sosial Demokrat Partiyasının üzvü, sabiq xarici işlər naziri Frank-Valter Ştaynmayeri dəstəkləyib. Qələbə üçün 631 səs kifayət edir.
Federal Məclis parlamentin 630 deputatından və bölgələrin 630 nümayəndəsindən ibarətdir.
2012-ci ildə seçilmiş indiki prezident Yoahim Qaukun səlahiyyət müddəti gələn ay başa çatır.
Frank-Valter Ştaynmayerin 61 yaşı var. 1975-ci ildən Sosial Demokrat Partiyasının üzvüdür. 2005-2009 və 2013-2017-ci illərdə xarici işlər naziri postunu tutub, 2007-2009-cu illərdə kanslerin müavini vəzifəsində də çalışıb. Onu prezidentliyə kansler Angela Merkelin Xristian-Demokrat İttifaqı namizəd göstərmişdi.
