Fransa millətçilərinin lideri önə çıxır
“OpinionWay” şirkəti Fransadakı prezident seçkisi ilə bağlı yeni sorğunun nəticələrini açıqlayıb. Novator.az-ın məlumatına görə, fevralın 10-dan 12-dək aparılmış sorğuya 1590 nəfər qatılıb.
Fransada prezident seçkisinin ilk turu aprelin 23-də, ikinci turu mayın 7-də keçiriləcək.
Hakim Sosialist Partiyasının liderlərindən olan dövlət başçısı Fransua Oland prezident seçkisində namizəd olmaq istəməyib. Bu qurumu seçkidə sabiq təhsil naziri Benua Amon təmsil edəcək. Sağ və mərkəzçi partiyaların namizədi sabiq baş nazir Fransua Fiyondur.
“OpinionWay”ın sorğusunda iştirak edənlərin 26%-i prezident seçkisinin ilk turunda Milli Cəbhənin lideri Marin Le Penə səs verəcəyini bildirir.
Rəyi öyrənilənlərin 22%-i sabiq iqtisadiyyat naziri Emmanuel Makrona dəstək ifadə edir.
Fiyonu seçicilərin 21%-i dəstəkləyir.
Respondentlərin 63%-i ikinci turda Makrona üstünlük verəcəyini bəyan edir. 37% Le Penə tərəfdardır.
Sorğuya görə, ikinci tura Fiyon çıxacağı halda onun 58%, Le Penin 42% səs toplamaq imkanı var.
