Ərdoğan konstitusiya dəyişiklikləri layihəsini imzaladı
Fevralın 10-da Türkiyə prezidenti Rəcəb Teyyub Ərdoğan ölkə konstitusiyasına dəyişikliklər layihəsini imzalayıb. Beləliklə, layihənin referenduma çıxarılmaq yolu açılıb.
Novator.az bildirir ki, Hakim Ədalət və İnkişaf Partiyasının hazırladığı, parlamentdən keçən konstitusiya dəyişikliyi layihəsi prezidentin həm dövlət başçısı, həm də hökumət başçısı olmasını nəzərdə tutur. Nazirlər Kabineti, baş nazirlik ləğv olunur. Prezidentin bir çox səlahiyyəti artırılır, ona partiya üzvü olmaq hüququ verilir.
Layihədə parlamentin deputatlarının sayını 600-ə qaldırmaq təklif edilir. Parlamentin səlahiyyətləri əsasən qanunvericilik işi ilə məhdudlaşır. Dövlət başçısının parlamenti buraxmaq, parlamentin isə prezidenti istefaya göndərmək səlahiyyəti olacaq. Bu hallarda prezident və parlament seçkiləri birlikdə keçiriləcək.
Hazırda Türkiyə parlament respublikasıdır, hökuməti 550 nəfərlik parlamentdə azı 276 mandatı olan partiya qurur. Prezident isə dövlət başçısıdır.
