Prezident paytaxtdakı bəzi obyektlərdə olub
Rabitə və Yüksək Texnologiyalar Nazirliyinin Bakıdakı 1 saylı poçt filialında apardığı yenidənqurma işlərindən sonra fevralın 10-da yeni xidmət mərkəzinin açılışı olub. Prezident İlham Əliyev açılış mərasimində iştirak edib.
Bildirilib ki, Rabitə və Yüksək Texnologiyalar Nazirliyinin qurumlarının vətəndaşlara göstərdiyi xidmətlər poçt və telekommunikasiya binalarında yaradılan yeni xidmət mərkəzlərində təqdim olunacaq. “Şəbəkə” adlanan ilk xidmət mərkəzi paytaxtın Üzeyir Hacıbəyli küçəsindəki 1 saylı poçt filialında istifadəyə verilib. Mərkəzdə son texnoloji tələblərə uyğun avadanlıqlar – müasir lazer printerlər, monoblok kompüterlər, özünəxidmət köşkləri, valyuta mübadiləsi və ödəmə terminalları, ATM, bank sistemində tətbiq olunan növbə aparatı (Q matik), tam yenilənmiş abunə qutuları quraşdırılıb, müasir tələblərə cavab verən çeşidləmə otağı yaradılıb.
AZƏRTAC xəbər verir ki, həmin gün dövlət başçısı əsaslı yenidənqurmadan çıxmış Bakı Dəmir Yolu Vağzalına da baş çəkib, sonra “Azərbaycan Dəmir Yolları” Qapalı Səhmdar Cəmiyyətinin inzibati binasında əsaslı yenidənqurmadan sonra yaradılan şəraitlə tanış olub.
