Biznesmen deputat partiya sədrliyinə qayıtdı
Ermənistan parlamentinin deputatı, biznesmen Qaqik Sarukyan yenidən Çiçəklənən Ermənistan Partiyasının sədri seçilib. Novator.az-ın məlumatına görə, Qaqik Sarukyan sədr postuna fevralın 10-u Yerevanda keçirilən növbədənkənar qurultayda qaytarılıb.
Ölkənin ən varlı adamlarından olan Qaqik Sarukyan Çiçəklənən Ermənistan Partiyasını 2004-cü ildə yaradıb. Ermənistan parlamentində partiya deputat sayına görə ikinci fraksiyadır. Sabiq prezident Robert Köçəryana yaxınlığı ilə tanınan partiya 131 yerlik parlamentdə 33 deputatla təmsil olunur.
2015-ci ildə Qaqik Sarukyan Ermənistan prezidenti Serj Sərkisyanla ziddiyyətlər üzündən siyasi arenadan çəkilmişdi. O vaxtdan partiyaya parlament fraksiyasının lideri Naira Zöhrabyan rəhbərlik edirdi.
