Xarici İşlər Nazirliyindən Lapşin açıqlaması
Azərbaycanın Xarici İşlər Nazirliyinin mətbuat xidməti Aleksandr Lapşinin işi ilə əlaqədar məlumat yayıb. Qeyd olunur ki, ayrı-ayrı ölkələrin vətəndaşlığını daşıyan Lapşin barəsində cinayət işinin açılması və onun Azərbaycana ekstradisiya edilməsi məsələsinin siyasiləşdirilməsi və ya ona siyasi don geyindirilməsi cəhdləri düzgün deyil: “Sırf hüquqi xarakter daşıyan bu məsələyə hüquqi müstəvidə baxılmalıdır. Vətəndaşlığını daşıdığı ölkələrin Xarici İşlər nazirliklərinin xəbərdarlığına baxmayaraq Lapşin Azərbaycan Respublikasının işğal edilmiş ərazilərinə Azərbaycan hökumətinin icazəsi olmadan qanunsuz səfərlər edib və Azərbaycanın beynəlxalq səviyyədə tanınmış ərazi bütövlüyünün parçalanmasına çağırışlar edib. Adının arzuolunmaz şəxslər siyahısında olduğunu bilərək o, 2016-cı ilin iyununda başqa ölkənin pasportu ilə yenidən Azərbaycan ərazisinə daxil olub. Bu əməlləri qəsdlə və qərəzli şəkildə etdiyini açıq şəkildə bildirib.
Lapşınin hərəkətlərində dövlət əleyhinə yönələn açıq çağırışlar və dövlət sərhədini qanunsuz keçmə əməllərinin tərkib əlamətləri olduğundan Baş Prokurorluq fakta görə Cinayət Məcəlləsinin 281.2 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlayıb və barəsində dövlətlərarası axtarış elan edilib.
Lapşini 2016-cı ilin dekabrın 14-də Belarus Respublikasının hüquq mühafizə orqanları saxlayıb. O, 7 fevral 2017-ci ildə Belarus Respublikasından Azərbaycan Respublikasına ekstradisiya edilib və Bakı İstintaq Təcridxanasına yerləşdirilib. Lapşinin məsələsinə Azərbaycan Respublikasının qanunları çərçivəsində baxılır.
Lapşin məsələsi bir daha göstərir ki, Ermənistan əcnəbi vətəndaşları müxtəlif qeyri-qanuni yollar və aldatma ilə Azərbaycanın işğal olunmuş ərazilərinə qanunsuz səfərlərə sövq edir və sonradan həmin şəxsləri özünün siyasi təbliğatının alətinə çevirməyə çalışır.
Xarici İşlər Nazirliyi bir daha əcnəbi vətəndaşları Azərbaycanın işğal olunmuş ərazilərinə qanunsuz səfərlərdən çəkinməyə, digər dövlətləri isə öz vətəndaşlarını bu kimi səfərlərin hüquqi fəsadları barədə xəbərdar etməyə çağırır”.
Azərbaycanın axtardığı bloqçu Belarusda tutulub
Bloqçu Azərbaycana təhvil verilir
Bloqçu üzr istəyib canını qurtara bilər?
Lapşin Azərbaycandan əfv istəyir
Moskva Lapşinin Azərbaycana verilməsini istəmir
Nöqtə: Lapşin Azərbaycana təhvil verilir
Lapşin Bakı İstintaq Təcridxanasına köçürülüb
